×

السلام عليكم

انا افتقد نفسي بشدة
10 سنوات .. 10 سنوات وانا ضايعة .. مش انا .. دفنت حالي 10 سنوات .. وشخصية تانية هي اللي كانت موجودة .. بس اتفرج عحالي بالمراية بنصدم مين هاي البنت!! انا وين؟؟؟؟
لحظة ضياع استمرت 10 سنوات .. هاي اللحظة اللي كان المفروض اني ارجع ارتب اموري واولوياتي .. لكن للاسف اخدت قرار مصيري خلاني استمر بالضياع 10 سنين .. زواجي ناجح وزوجي ما في احسن منه لكن اجى بالوقت الغير مناسب ابدا .. زوجي اللي بحكيلي انا رح اضل احفر بقلبك لاني واثق اني رح الاقي جوهرة .. مقصرة معه بكل اشي بابسط حقوقه .. بالاشياء العادية مقصرة معه .. وهو متحمل وبدعمني .. بس اديش رح يضل متحمل!!
الانسانة اللي كانت من اركز واهدء واروق وانبل حدا .. اللي كان الصغير والكبير يحبها ..واللي كان الكبير قبل الصغير والغريب قبل الكبير يستشيرها .. اللي كانت بقمة النظام والرتابة والثقافة .. تحولت لانسانة لامبالية فوضوية عصبية .. اقرب الناس يهرب منها ويتجنبها وما يقدر يحكي معها كلمة ..
اولوياتي وطموحاتي واهدافي واحلامي كلها تجمدت 10 سنين.. حتى صلاتي ما بتذكر متى اخر مرة صليت .. ولا اخر مرة فتحت القران وقرات ..
الاكتئاب اللي بحس فيه مش معقول .. قلبي مرة حجر ومرة متفتت ومرة نار ومرة رماد .. الانتحار .. الطلاق .. الانعزال هاي الافكار هي بس اللي بتراودني يوميا وقبل النوم .. يمكن اكون جبانة وما اقدر عمواجهة الموت .. لكني كل يوم بموت الف مرة ..
كل مرة وكل يوم بسأل نفسي وين بقدر الاقي نفسي وكيف!!!!! 
بعتذر عالاطالة لكن كنت باحوج ما يكون لابوح ببعض ما يثقل قلبي .. قراتوا او ماحدا قرا مش كتير مهم .. بس عنجد محتاجة احكي لاني انخنقت وما في حدا احكيله واشكيله حتى امي.. انا مش بس محتاجة مساعدة .. انا محتاجة مصحة نفسية اقعد فيها كم شهر او كم سنة ابعد فيها عن كل اشي بحياتي .. يمكن انا محتاجة للحج بشدة