أعاني من تلعثم بالكلام .. ماذا أفعل ؟
السلام عليكم
أنا عمري 18 سنة انخلقت طبيعية وما فيي شي الحمدلله، مع مرور الحياة تعرضت لصدمات كتيرة، سببتلي اضطرابات نفسية واكتئاب حاد ..
الحمدلله قدرت اعالج نفسي بنفسي بنسبة 70% بس بعدين صرت الاحظ إنه نطقي وطريقة كلامي بطلت طبيعية، يعني بصير اعكس الجمل !
مثلا بدل ما احكي : شرب الطفل الحليب، بقوم بحكي : الحليب .. طفل شرب!
هيك بشكل متقطع ومش مفهوم للمستمع!
أقسم بالله الموضوع مدايقني ومش عارفة سببه وحله، لدرجة انه حتى بس اكتب لا إراديًا بقلب الأحرف مثلا بدل ما اكتب نعم بكتب عمن ! يعني بجيب الحروف بس الترتيب لا!
غير إنه بس حد يحكي بموضوع معين فجأة بشت وبنسى بشو بحكي معي!!
وصرت الاحظ إنه الموضوع اتطور أكتر من هيك وصرت احكي بسرعة عن الف موضوع بالثانية! وما حد بفهم شو بحكي ..
ما اهتميت لضحك الناس علي، واستغرابهم من طريقة كلامي بس والله الموضوع محرج ومؤذي نفسيا، خاصة إنه كانت عندي القدرة زمان على الارتجال بشكل جدا جميل، والالقاء بكل اتقان ..
اما اليوم ..
الحمدلله على كل حال!!
بعرف طولت عليكم . بس إذا عندكم فكرة شو هاد يلي بصير معي وشو الحل؟ خاصة انه صعب أروح عالدكتور والموضوع بتطور معي بشكل سريع جدا ..
وشكرا ..