أخر الأخبار
أوضاعي المادية لم تساعدني
أوضاعي المادية لم تساعدني

السلام عليكم

انا قصتي كالتالي، عرفت بنت من كم سنه وكانت معي بالجامعه وأصغر مني بسنه ونص، وهيه كانت بالنسبه الي صديقه مقربه مني جدا وكنا كثير كثير فاهمين بعض لدرجة انه مرات بتتنبأ بكلامي قبل ما احكيه والعكس كذلك، وحتى مشاكلي كانت هيه ملجأي بعد رب العباد وكثير كنا متفاهمين لأبعد الحدود. وللأمانة كنت معتبرها صديق مقرب مني جدا وبس تكون زعلانه احاول قدر الإمكان اساعدها وهي بتحس اذا واقع بمشكله او مستاء من شغله وكان كل كلامنا مقتصر فقط على سوشل ميديا أو تسجيلات وطلعات ما كان في داعي وهيك كنا متفاهمين. وعلاقتنا عم تكبر أكثر وأكثر.
شاءت الظروف بعد بفترة وعدة سنوات صار يجيها خطابين كثير.. انا بهاي الايام حسيت بالحامي وما حبيت تروح هيك فجأة! وكيف تضيع سنوات هيك فجأة.. لهيك فتحت معها الموضوع انه بدي ياها وكانت فرحه غامريتنا جميعا وانا متحمس بس وضعي ما كان يسمح إني أخوض بتفاصيل الزواج وخصوصاً بهذاك الوقت وفهمتها هذا الكلام وعلما أنا كنت ابني نفسي في ظل هاي الظروف الصعبه وبس أصروا أهلها عليها انه شو الأسباب ما بتوافقي وبحكم انه علاقتنا كانت مخفيه وماحد يعرف عنا ما حكت لأهلها عني ولا انا كنت حاكي لأهلها وانا اقنعت نفسي فيها وحكيت لأهلي عنها وكان الإتكال على رب العالمين ورحنا عندهم قعدتين، وبعد ما دخلنا من الباب كل شي صار ضدي وعلى الأرجح بسبب إنه وضعي لسا بده سنة زمان على الأقل لحتى تصير الأوضاع افضل وكانت حجتهم ما حسيناكم لبعض ومن هالكلام يعني بالأحرى ما حسيت اني دخلت مخهم مثل سحر وغم على عيونهم وعيوني ما بينولي بس حسيت انه الوضع مش تمام من ناحيتهم رغم انه كنت واضح والمصداقية كانت ١٠٠٪ وانا من الأشخاص نفسي عزيزه علي وبس حسيتهم مش مرتاحينلي وبعد قعدتين معهم لغيت الموضوع اني افكر اطلب بحكم انه ما حبيت الطريقه والاسلوب الي لاقوني فيه من العائلة جميعا.. ططبعا كلها تياسير ومش انه ناقصني شي بس ربنا يمكن اختارلي الأفضل وما كان فيه وفاق.. ضليت فتره بحكي معها على الخفيف وبس اجاها نصيبها بواحد غيري وهيه كانت محتاره حكيتلها شوفي دربك والقلب داعيلك ومسحت كل ما يتعلق فيها من رسائل وغيره وخطبت وللآن بدعي ربنا الها بالخير والبركة.