×

انا اريد ان اطرح مشكلة نفسي اعرف ليش بتلاقي الشب عمره 18 او 19 وبياخذ مصروفه من ابوه ومع ذلك بتلاقيه فاتح علاقات مع بنات الناس ؟ وهو ماعنده اي مؤهل من مؤهلات الزواج ومامعه يشتري بطاقة شحن ام الدينار ؟ يعني على اي اساس بحاكي البنت وبيوعدها انه رح يتزوجها لاجل غير مسمى ؟ 
كيف يعني بده يحجزها ؟ يعني على مستوى انه الواحد بكون عمره بالثلاثين وفي بباله بنت معينة وبحاكيها عالتلفون وبكون عنده بيت وسيارة واثاث ومهر مقدم ومؤخر ...إلخ ..ومع ذلك مابيضمن انه ياخذ حبيبته يلي بتحبه . 

فإيش حال الشباب الصغار حتى يلي اعمارهم بالعشرين ، كل شب إلا وبحاكي بنت وهذا الشي معروف انهم كل الشباب بحاكوا بنات بلاش نضحك على انفسنا ، بس انا يلي مش فاهمته إنه قلما نلاقي شب عند وعده ، يعني بتلاقيه متمسك باحبال الحب لكن بدون اي مؤهل من مؤهلات الزواج ، ومفكرين إنهن بنات الناس لعبة ، والمشكلة إنها لو حبيبتهم تزوجت غير يلوموها لانها وافقت عالعريس . 

ياشباب مجتمعي الله يخليكم افهموا شغلة : انها البنت مش متل الشب بالزواج يعني البنت باي لحظة ممكن ييجيها عريس اما الشب بده فت خبز لحتى يخطب بده مدة طويلة لحتى يوصل لمؤهلات الزواج ، فليش الشب يخلي حبيبته تغامر معه وتستنى هالمدة الطويلة ؟ هذا حقها انها تتزوج لانها مابتضمن انه هالحب يكون ناجح وعصفور باليد ولا عشرة عالشجرة ، الحب الحقيقي بعد الزواج وهيك علم النفس بقول . 

الى كل شب بحكي مع بنت مش محللة اله شرعا : 
مافي بنت بترفض عريس جاهز منشان خاطر انسان مابحبها لانه لو عنجد حبيبها بحبها كان شد حيله عالآخر لحتى يحصل عليها بالحلال . كل البنات بتبحث عن مصلحتها وطبعا مش ملامة على هالاشي ،هيك الناس كلهم ، لانه فعليا الحب مابطعمي خبز . والحب شيء مش ملموس اما العريس شيء حقيقي وملموس بواقع البنت واهلها . 

نفس الشي كلمة اخيرة لكل شباب الاردن : 
والله والله ثم والله انا بعرف بنات كثير في على تلفوناتهن اكثر من شب ومسمياتهم باسماء بنات ، وبتلاقي البنت بتحكي لكل شب من هالشباب يلله تعال اخطبني وبمجرد مايتقدملها اول شب من هالشباب يلي على تلفونها ، بتحكي للباقيين فرصة سعيدة اهلي غصبوني عالزواج ومش رح انساك طول عمري .

طبعا البنت بتخاف على حالها من العنوسة لهيك بتتصرف عالتصرف وبتحكي مصلحتي اهم من مصلحة الشب وخاصة انه من المعروف انه بالعادة الشباب بيضحكوا عالبنات فلهيك البنت بدها لحتى تضمن مستقبلها بتحط عدة شباب ببالها لحتى تضمن الزواج يعني فيما لو فشلت مع واحد تنجح مع التاني . 

انا مابايد هالتصرف هذا بس خذوا حذركم من البنات لانه بصراحة هاي الايام الشباب هم المساكين اكتر من البنات . 

ووالله تبينلي انه افضل زواج هو يلي بييجي مباشرة من ولي امر البنت وعلى سنة الله ورسوله ، لانه حتى ولو إنا سمعنا عن قصص حب توجت بالزواج لكن 99% من الحب فاشل ، والله دايما يا اما الشب خاين يا اما البنت خاينة يا اما الشب مامعه مادة لحتى يحجز حبيبته يا اما الاهالي مابوافقوا يا اما .. يا اما ... والواحد بعيش حياته موجوع القلب لانه مالقى حبيبه زوجه. فليش يفتح هالابواب المغلقة ويحب من الاصل ؟ 

عدا عن انه الحب فعليا بكون من طرف واحد وهو الطرف يلي تقدم بالبداية بهاي العلاقة يعني الطرف هذا بكون متوجع ومتالم من الفراق اما الطرف الآخر مابكون سائل عن حبيبه بالعادة . 

ويكفي القصص يلي دايما بنسمعها حويلانا . 

بدكم الصراحة انا عندي خبرة بالعلاقات العاطفية رغم اني ماحكيت غير مع شب واحد وهو الوحيد يلي حبيته ومع ذلك طول فترة كلامي معه رغم انه الحب بلش من طرفي انا لكن ظليت كرهانة من نفسي هالتصرف لانه هالشب اكيد مابيرضى عاخته تحاكي شباب يعني المفروض اني انا اكون بنظره وحدة مش مربية خاصة لو ماكان بيرضى على اخته تحاكي شباب والاشي يلي بحيرني انه انا يلي سمعته انه لما البنت تسال حبيبها ليش مابترضى على اختك تحاكي شب بقصد الزواج ؟ بصير يحكيلها لانه مافي شب خلوق متل اخلاقي !!!!!!!!!!! يعني كل شب كل شب بجاوب نفس الجواب وما شالله شباب مجتمعنا كلهم اخلاق اللهم لاحسد . 

حسب خبرتي من الصاحبات والناس بشكل عام انه قصص الحب دايما فاشلة وكل واحد بدور على مصلحته . 

آسفة عالاطالة الكبيرة لكن والله دايما بفكر بهالامور وانا متضايقة من هالاشياء يلي بتصير بالبلد . يعني هاي المشكلة لاتعتبر مشكلة بتخصني بس هاي المشكلة موجودة بمجتمعي فعليا حتى لو انها مابتخصني انا بس اكيد اكيد بتخص كتير شباب وبنات. 
اللهم اهديني واهدي شباب وبنات المسلمين . 

السلام بداية ، والسلام ختام