نسخة عن أمه !!
السلام عليكم ورحمة الله وبركاته
انا انسانة بسيطة ومتواضعة وعاطفية كتير وزوجي انسان صادق ومحترم لابعد الحدود
بس مشكلتي اني بحسه بده اياني نسخة عن امه ...!!
انا بعترف انو امه ست بيت مكافحة ربت وعلمت واشتغلت وتعبت حتى بغياب زوجها معظم الوقت عنها..
بس في شغلة الاكل.. كل طبخة لازم تكون ' كوبي' عن طبخة امه لدرجة مستفزة.. يعني لازم امه تشرح له الطبخة بالتفصيل الممل وبعدين لازم انفذها حرفيا لانه اي شي مختلف بتبطل تعجبه!
هلأ بعضكم رح يحكي لي سايريهم واعملي اللي زوجك بده اياه واكسبي محبته ورضاه ...
بس يا جماعه انا بشر مو ملاك يعني ما بقدر اضل امثل وكل طبخة احكي مع امه وتقعد تشرح لي وتعيد وتزيد مرتين وتلات نفس الحكي .. ويا ريت بس اول مره وخلص!
صرت عاملة الكبسة 100 مرة ولهلأ بترجع بتعطيني الوصفة السحرية!! وقيسوا على كل الطبخات!! غير الاضافات اللي بتزيدها وانا شخصيا ما بحبها .. متلا لازم احط حمص مع السبانخ وبروكلي مع الفاصولياء وغيره كتير!!
هلأ من كتر ما عم أعترض زوجي صار يمشي لي مرات رغبتي ..بس مرات بس تعطيه الوصفة ويكتشف اني مو عامله متلها ببطل ياكل وبزعل وبعمل مشاكل!!
منطق هالحكي وانا والله ما بعرف انافق وامثل بحكي لي سايريني وانا مش قادرة ..
بحكي له انا مش امك وما بقدر اكون متلها ..
شو رايكم انا صح ولا غلط ..؟!!