جارتي لا تمل من البقاء عندي طول الوقت
مرحبا
بدي أحكي لكم مشكلتي .. بتعرفوا القطط اللي ' بدبقوا ' بالبيت احيانا وما بتفك منهم الا لما تنقلهم بالسيارة على تاني بلد؟ ويمكن يرجعولكم تاني يوم الصبح على باب البيت ؟؟؟
جارتي هيك ،، اي والله طقت روووحي .. لازقة في لزقة رهيبة .. دائما بدها تطلع عندي .. ومش مرة مرتين وتلاتة خلال النهار .. وبدون هدف..
لو تضل قاعدة عندي وفاتحة الفيس من تلفونها المهم تضل قاعدة!!
ومع إني ما برد زياراتها إلا إنها بتضل رايحة جاي ..حاولت بشتى الطرق انها ما تيجي مرة بقولها علي شغل بتقول باجي اساعدك .. وبتضل قاعدة وتستنى الضيافة !!
اذا بدرس الأولاد برضه بتضل قاعدة ما تقولوا الا إنه مدفوع لها راتب انها تضل عندي!!
انا من الناس اللي ما بحب الخلطة الزايدة وما بحب اتعرف على الناس اكتر من اللزوم لعلاقة اجتماعية محترمة .. وهي من النوع اللي بتفوت الناس بكل تفااااااصيل حياتها..
متى تصحى ومتى نامت وايش افطرت وايش تغدت - واجلكم الله - حتى لما تفوت الحمام لازم تقول!!
والله حاولت بكلام منيح وبكلام قاسي ما زبط معها اشي ..
والادهى انه ما بيفرق معها اذا كان زوجي بالبيت او لأ .. عادي بتفوت وبتقعد وبتعيش حياتها طبيعي والله عجزت ما ضل ولا وسيلة
انا ما بدي اقطع علاقتي معها بالمرة لانها جارتي وبخلقتي .. وبنفس الوقت ما بدي تضلها ساكنة عندي !!
وحتى لما ما تيجي عندي بتضلها تتصل في كتيرررررر واذا ما رديت بتطلع وبتنزل بوستات على الفيسبوك!!
طققتني روحي .. كل اشي بتشوفه لازم تنزله على صفحتي !!
للامانة البنت منيحة مش عاطلة .. بس دبقة !! وانا بمل
يعني جوزي لما يضل طول النهار بالدار بتطق روحي .. كيف لو كان حد غريب ؟؟
وما بقدر اخد راحتي انا واولادي وللاسف صرت اخلي اولادي يكذبوا عليها من شان اخد كم دقيقة راااحة
طولت عليكم بس جد روحي طقت ..ساعدووووووووني !!!